ປະຫວັດການກຳເນີດ ແລະ ການເຕີບໃຫຍ່ຂະຫຍາຍຕົວ ຂອງກຳລັງຄົ້ນຄວ້າວິທະຍາສາດ ແລະ ປະຫັວດສາດ ປ້ອງກັນຄວາມສະຫງົບ
ກົມຄົ້ນຄວ້າວິທະຍາສາດ ແລະ ປະຫວັດສາດປ້ອງກັນຄວາມສະຫງົບ ແມ່ນກົມວິຊາສະເພາະໜຶ່ງໃນໂຄງປະກອບກົງຈັກການຈັດຕັ້ງຂອງກະຊວງປ້ອງກັນຄວາມສະຫງົບ ໄດ້ຮັບການສ້າງຕັ້ງຂຶ້ນໃນວັນທີ 09 ສິງຫາ 2002 ຕາມຂໍ້ຕົກລົງຮັບຮອງ ຂອງລັດຖະມົນຕີວ່າການກະຊວງປ້ອງກັນຄວາມສະຫງົບ ສະບັບເລກທີ 015/ປກສ, ລົງວັນທີ 04 ມັງກອນ 2012.
ມີພາລະບົດບາດເປັນເສນາທິການ ໃຫ້ລັດຖະມົນຕີວ່າການກະຊວງປ້ອງກັນຄວາມສະຫງົບ ໃນການຄົ້ນຄວ້າ ວາງແຜນ, ກຳນົດໂຄງການ, ກວດຜ່ານ, ປັບປຸງ, ຮັບຮອງ, ຄຸ້ມຄອງກ່ຽວກັບວຽກງານວິທະຍາສາດ, ປະຫວັດ ສາດ, ຍຸດທະສາດ, ກົດໝາຍ ແລະ ນິຕິກຳ, ເຜີຍແຜ່, ຊຸກຍູ້, ກວດກາປະເມີນຜົນການຈັດຕັ້ງປະຕິບັດກົດໝາຍ ແລະ ບັນດານິຕິກຳຕ່າງໆໃນກຳລັງປ້ອງກັນຄວາມສະຫງົບ.
ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານໃນໄລຍະໃໝ່, ເຊິ່ງເປັນໄລຍະແຫ່ງວິທະຍາສາດ ແລະ ເຕັກໂນໂລຊີ ທີ່ທັນສະໄໝ ຂະຫຍາຍຕົວຢ່າງໄວວານັ້ນ ຍິ່ງມີຄວາມຈຳເປັນເພື່ອນຳໃຊ້ຄວາມກ້າວໜ້າທາງດ້ານວິທະຍາສາດ-ເຕັກນິກ-ເຕັກໂນໂລຊີ ເຂົ້າໃນວຽກງານກໍ່ສ້າງ ແລະ ປັບປຸງກຳລັງ ກໍ່ຄືວຽກງານປ້ອງກັນຄວາມສະຫງົບ ໃຫ້ມີປະສິດທິຜົນ.
ມາຮອດ ປີ 1994 ກະຊວງພາຍໃນໄດ້ສ້າງຕັ້ງສູນຄົ້ນຄວ້າວິທະຍາສາດ ປກສ ຂຶ້ນກັບກົມໃຫຍ່ກໍ່ສ້າງກຳລັງ ມີພາລະບົດບາດໜ້າທີ່ ໃນການຄົ້ນຄວ້າປະຫວັດສາດມູນເຊື້ອ ແລະ ຄົ້ນຄວ້າວິທະຍາສາດວິຊາສະເພາະ ຂອງກຳລັງປ້ອງກັນຄວາມສະຫງົບປະຊາຊົນ; ມາເຖິງປີ 1997 ສູນຄົ້ນຄວ້າວິທະຍາສາດ ປກສ ໄດ້ຍົກຍ້າຍໄປຂຶ້ນກັບຫ້ອງວ່າການກະຊວງ ສ່ວນວຽກງານຄົ້ນຄວ້າປະຫວັດສາດມູນເຊື້ອ ຂອງກຳລັງໄດ້ແຍກອອກຈາກສູນໄປຂຶ້ນກັບກົມໂຄສະນາອົບຮົມກົມໃຫຍ່ກໍ່ສ້າງກຳລັງ;
ມາຮອດ ປີ 1997 ກະຊວງພາຍໃນຕົກລົງຍົກຍ້າຍສູນຄົ້ນຄວ້າວິທະຍາສາດ ປກສ ຈາກກົມໃຫຍ່ກໍ່ສ້າງກຳລັງ ມາຂຶ້ນກັບຫ້ອງການກະຊວງ ມີພາລະບົດບາດເປັນເສນາທິການໃຫ້ແກ່ຫ້ອງການກະຊວງພາຍໃນ ໃນການຄົ້ນຄວ້າ ແລະ ຮຽບຮຽງບັນດາເອກະສານຕ່າງໆ ເພື່ອຮັບໃຊ້ໃຫ້ແກ່ລັດຖະມົນຕີ; ປະສານສົມທົບກັບບັນດາໂຮງຮຽນ ຂອງກຳລັງປ້ອງກັນຄວາມສະຫງົບ ເພື່ອພັດທະນາ ແລະ ກໍ່ສ້າງຫຼັກສູດການຮຽນ-ການສອນ ໃຫ້ເໝາະສົມກັບສະພາບຄວາມເປັນຈິງ ຂອງກຳລັງ ແລະ ເຂົ້ນຮ່ວມເປັນຄະນະກຳມະການສອບເສັງຈົບຊັ້ນຂອງນັກບັນດາໂຮງຮຽນດັ່ງກ່າວ.
ມາເຖິງປີ 2002 ພາຍຫຼັງກະຊວງໄດ້ດຳເນີນການປັບປຸງກົງຈັກການຈັດຕັ້ງຂອງຕົນ, ໃນນັ້ນ “ສູນຄົ້ນຄວ້າວິທະຍາສາດປ້ອງກັນຄວາມສະຫງົບ” ໄດ້ຍົກລະດັບຂອງສູນເປັນຫົວໜ່ວຍເອກະລາດຂຶ້ນກັບກະຊວງໂດຍກົງ ໃນວັນທີ 09 ສິງຫາ 2002 ພາລະບົດບາດໜ້າທີ່ຕົ້ນຕໍ ຂອງສູນຄົ້ນຄວ້າວິທະຍາສາດປ້ອງກັນຄວາມສະຫງົບ ເປັນເສນາທິການໃຫ້ຄະນະ-ຄະນະບັນຊາກະຊວງປ້ອງກັນຄວາມສະຫງົບ ໃນການຄົ້ນຄວ້າວຽກງານຍຸດທະສາດ-ວິທະຍາສາດ ປກສ, ຄົ້ນຄວ້າວິໄຈ, ກວດຜ່ານນິຕິກຳທີ່ກ່ຽວພັນເຖິງຂົງເຂດວຽກງານປ້ອງກັນຄວາມສະຫງົບ ເປັນຕົ້ນຂຶ້ນແຜນໂຄງການຄົ້ນຄວ້າຍຸດທະສາດການຕໍ່ສູ້, ປ້ອງກັນ, ສະກັດກັ້ນອາດຊະຍາກຳຢູ່ ສປປ ລາວ, ຈັດຕັ້ງຂຶ້ນແຜນຄົ້ນ ຄວ້າວິທະຍາສາດ ແລະ ດຳເນີນການເຄື່ອນໄຫວສະພາວິທະຍາສາດ ໃນກຳລັງປ້ອງກັນຄວາມສະຫງົບ, ກວດຜ່ານ,ຮຽບຮຽງບັນດານິຕິກຳ, ໂຄສະນາເຜີຍແຜ່, ຕິດຕາມ, ກວດກາການຈັດຕັ້ງປະຕິບັດກົດໝາຍ ໃນກຳລັງປ້ອງກັນຄວາມສະຫງົບປະຊາຊົນ; ໃນໄລຍະດຽວກັນນີ້ໄດ້ມີການມອບຮັບວຽກງານມູນເຊື້ອທີ່ຂຶ້ນກັບກົມໂຄສະນາອົບຮົມ ກົມໃຫຍ່ການເມືອງ ໃຫ້ມາຂຶ້ນກັບສູນຄົ້ນຄວ້າວິທະຍາສາດ ປກສ.
ເພື່ອຕອບສະໜອງໜ້າທີ່ການເມືອງໃນໄລຍະໃໝ່ ແລະ ການເຕີບໃຫຍ່ຂະຫຍາຍຕົວຂອງໜ້າທີ່ວຽກງານ ແລະ ກົງຈັກການຈັດຕັ້ງ ໂດຍອີງໃສ່ ຂໍ້ຕົກລົງສະບັບເລກທີ 686/ປກສ, ລົງວັນທີ 07 ສິງຫາ 2007 ຂອງລັດຖະມົນຕີວ່າການກະຊວງປ້ອງກັນຄວາມສະຫງົບ ວ່າດ້ວຍການປ່ຽນຊື່ “ສູນຄົ້ນຄວ້າວິທະຍາສາດປ້ອງກັນຄວາມສະຫງົບ” ມາເປັນ “ກົມຄົ້ນຄວ້າປະຫວັດສາດ ແລະ ວິທະຍາສາດ ປກສ” ຕໍ່ມາປີ 2009 ຂັ້ນເທິງຈຶ່ງຕົກລົງປ່ຽນຊື່ຈາກ “ກົມຄົ້ນຄວ້າປະຫວັດສາດ ແລະ ວິທະຍາສາດ ປກສ” ມາເປັນ “ກົມຄົ້ນຄວ້າວິທະຍາສາດ ແລະ ປະຫວັດສາດ ປກສ” ຕາມຂໍ້ຕົກລົງ ຂອງລັດຖະມົນຕີວ່າການກະຊວງປ້ອງກັນຄວາມສະຫງົບ ສະບັບເລກທີ 388/ປກສ, ລົງວັນທີ 21 ເມສາ 2009 ຈົນເຖິງປັດຈຸບັນແມ່ນໄດ້ການປັບປຸງເສີມຂະຫຍາຍວຽກງານໃຫ້ໜັກແໜ້ນເຂັ້ມແຂງກວ່າເກົ່າ, ຈຳນວນພົນໄດ້ເພີ່ມຂຶ້ນມີທັງໝົດ 62 ສະຫາຍ , ຍິງ 20 ສະຫາຍ, ມີສະມາຊິກພັກທັງໝົດ 48 ສະຫາຍ, ໂຄງຮ່າງການຈັດຕັ້ງໄດ້ຮັບການປັບປຸງ ເຊິ່ງປະກອບມີ 01 ຫໍພິພິທະພັນ, 01 ຫ້ອງການບໍລິຫານ ແລະ 06 ພະແນກຂຶ້ນກັບ; ມີພາລະບົດບາດເປັນເສນາທິການໃຫ້ລັດຖະມົນຕີວ່າການກະຊວງປ້ອງກັນຄວາມສະຫງົບ ໃນການຄົ້ນຄວ້າ,ວາງແຜນການ, ກຳນົດໂຄງການ, ກວດຜ່ານ, ປັບປຸງ, ຮັບຮອງ, ຄຸ້ມຄອງ ກ່ຽວກັບວຽກງານວິທະຍາສາດ, ຍຸດທະສາດ, ນິຕິກຳ ແລະ ປະຫວັດສາດ-ມູນເຊື້ອ.
